Pierre Rode, konpositore eta biolinjole frantziarra, Burdeosen jaio zan 1774ko otsailaren 16an, eta 1830eko azaroaren 25an hil zan.

Hamabi urtegaz biolinjole aparta zan. 1787an Parisera joan zan ikasten, 1790ean Europatik bidaiatu zan, bere artea erakutsiz, eta 1799ean, Parisera itzuli zanean, Operako bakarlaria eta kontserbatorioko irakaslea izendatu eben.

1803an Kontserbatorioko biolinaren metodoa idatzi eban, beste irakasle batzuekaz batera.

San Petersburgon eta Berlinen bizi izan zan, eta Vienan, Beethovenek berarentzat idatzitako Biolin eta orkestrarako erromantza interpretatu eban.

Hainbat obra idatzi ebazan, biolinerako eta orkestrarako, biolin erromantikoari egindako ekarpena oso garrantzitsua izanez.

Michael Praetorius, konpositore eta organojole alemaniarra, Turingian jaio zan 1571ko otsailaren 15ean, eta 1621ko otsailaren 15ean hil zan.

Organojole moduan aritu zan toki ezbardinetan. Bere konposizioetan musikari italiarren eragina somatzen da, Veneziako eskolako estilo polikoralana batez ere.

Lan ugari idatzi ebazan eta arrakasta handia lortu eban konpositore moduan, baita organista, zuzendari eta organogile bezala ere.

Gaur egun Terpsícore izeneko lanagatik ezagutzen da, berak moldatutako 300 dantza eta doinu frantziarrak.

Syntagma Musicum tratatua ere idatzi eban, bere sasoiko musika eta musika tresnei buruz.

Danubio urdina Johann Strauss semeak idatzitako balsa da.

Konpositore austriarrak 1867. urtean idatzi eban lan hau, Wiener Männergesangvereingo zuzendaria zan Johann von Herbeck-en enkarguz. Honek, bere koruak aratusteetan abesteko bals alai eta bizia nahi eban.

1867ko otsailaren 13an estreinatu zan, Diana aretoan, Rudolf Weinburm-en zuzendaritzapean, arrakasta handi barik.

Baina urte bereko udan, Pariseko Nazioarteko erakusketan, Straussek berak zuzendu ebanean, ospe itzela lortu eban.

Galeseko printzeak gonbidatuz, Ingalaterrako Covent Gardenen sei aldiz interpretatu zan. Ondoren, partituraren miloi bat kopi zabaldu ziran mundu guztian.

Gaur egun, Danubio urdina konposizio klasiko ezagunenetarikoa da. Austriarren bigarren ereserki bihurtu da, eta Vienako Urte barriko kontzertuan derrigorrezko bis-a da.