Autor: biotzf

Peter Cornelius, konpositore alemaniarra, Maguncian jaio zan 1824ko abenduaren 24ean, eta Maguncian hil zan 1874ko urriaren 26an.

Biolina jotzen eban eta gaztetarik liederrak konposatzen ebazan.

1841. urtean hasi zan konposizioa ikasten. Berlinen bizi zan sasoi batean, bere osaba Peter von Cornelius margolariagaz, eta hainbat pertsonai famatu ezagutu ebazan, Grim anaiak eta Mendelssohn, esaterako.

Lehenengo lan garrantzitsuak Weimar-en konposatu ebazan, eta gero Vienara joan zan bost urte bizitzera. Vienan Richard Wagner ezagutu eban, eta honen eraginez Munichera joan zan. Bertan ezkondu zan eta lau semealaba euki ebazan.

Giacomo Puccini, operako konpositore italiarra, Luccan jaio zan 1858ko abenduaren 22an, eta Bruselasen hil zan 1924ko azaroaren 29an.

XIX. amaierako eta XX. hasierako konpositore handienetarikotzat hartzen da.

Musikarien familia batean jaio zan eta bost urtegaz musika ikasketak hasi ebazan.

Antzerki musikalean sakondu eban, nahiko eklektikoa izanik, hizkuntza eta kultura musikal ezbardinak trebetasunez bereganatuz eta sintetizatuz.

Hamabi opera idatzi ebazan (beste musika lan askoren artean),  “Tosca”, “La Boheme”, “Madama Butterfly”, “Il Trittico” eta “Turandot” ezagunenetarikoak doguzalarik.

Lorenzo Perosi, konpositore italiarra, Tortonan jaio zan 1872ko abenduaren 21ean, eta Erroman hil zan 1956ko urriaren 12an.

Musika sakran espezializatua, arrakasta handiko musikaria dogu.

Kantu gregoriarran eta XVI. mendeko polifonian aditua izan da, eta bere lanetan eragin hau asko nabaritzen da.

Tenpluetan abesteko kantu liturgikoak landu ebazan, testuari garrantzi handia emonez.
Hala ere, orkestrarako eta organorako obrak eta kapera musika idatzi ebazan.

“Giovane Scuola” (eskola gaztea) konpositore italiarren taldeko kidea izan zan.
Hiru mila obra baino gehiago konposatu ebazan.

Antonio Soler, konpositore eta klabezinjole espainiarra, Oloten jaio zan 1729ko abenduaren 3an, eta San Lorenzo del Escorialen hil zan 1783ko abenduaren 20an.

Domenico Scarlatti konpositore italiarrak Espainian sarturiko musika korrontearen jarraitzailea izan zan, baita XVIII. mendeko teklaturako musikaren ordezkari garrantzitsuenetarikoa nazio mailan.

Haurra zala Montserrateko eskolanian sartu zan, musika eta organo ikasketak burutuz.

1752an apaiz konsagratu zan, Jeronimotarren ordenan. Hori dala eta “Padre Soler” bezala ezagutzen da.

Lleidako katedraleko kapera maisua izan zan, eta geroago El Escorialeko organojole eta koru zuzendari moduan aritu zan.

400 obra baino gehiago idatzi ebazan.